Höfuðstólslækkun 3+1 fyrir einstaklinga með erlend lán
Slitastjórn SPRON kynnir lántakendum hjá SPRON skuldbreytingarlausn sem tekur bæði á vanda vegna höfuðstóls erlendra lána og aukins greiðsluþunga eftir fall íslensku krónunnar.
Lækkun höfuðstóls erlendra lána um 26% að meðaltali
- Allt að 41% minni greiðslubyrði
- Úrræði stendur til boða til loka árs 2010
Lántakendum SPRON stendur til boða 26% lækkun höfuðstóls að meðaltali þegar láni er skuldbreytt í íslenskar krónur. Lækkunin tekur mið af myntsamsetningu og lengd lánasamnings. Við skuldbreytinguna verður lánið að íslensku verðtryggðu láni, 25 eða 40 ára, með föstum 3,95% vöxtum í þrjú ár og möguleika á lengingu um eitt ár fyrir skilvísa greiðendur. Eftir það verða fastir vextir lánsins 5,25%.
Jafnframt standa lántakendum til boða fastir óverðtryggðir 6,00% vextir í þrjú ár með lengingu í eitt ár fyrir skilvísa greiðendur. Þeir vextir breytast síðan í millibankavexti (REIBOR) + 1,50% en viðskiptavinum er einnig frjálst að skipta yfir í fasta verðtryggða 5,25% vexti.
Með aðgerð þessari geta lántakendur lækkað greiðslubyrði sína af erlendum fasteignalánum um allt að 41% og um allt að 20% ef miðað er við greiðslubyrði eftir greiðslujöfnun erlends láns.
Úrræði SPRON er hugsað til að koma á móts við þarfir heimila sem glíma við skerta greiðslugetu eða of háa skuldabyrði vegna erlendra lána. Úrræðið stendur viðskiptavinum til boða út árið 2010.
Slitastjórn SPRON tekur auk þess þátt í úrræðum ríkisstjórnarinnar að því er varðar greiðslujöfnun og greiðsluaðlögun.
Útibú Arion banka annast alla þjónustu við lántakendur SPRON.
Greiðslujöfnun fasteignaveðlána
Greiðslujöfnun erlendra lána léttir greiðslubyrði auk þess að jafna sveiflur vegna gengisbreytinga. Höfuðstóll er áfram í erlendri mynt og hækkar því eða lækkar miðað við gengi íslensku krónunnar. Verðtryggð íslensk lán í skilum fóru sjálfkrafa í greiðslujöfnun í desember 2009.
Lækkun veðhlutfalls niður í allt að 110% - Sértæk úrræði
Sértæk úrræði standa þeim til boða sem búa við sérstaklega erfiða greiðslustöðu. Sækja má um 110% veðsetningaþak á fasteignalánum (erlend lán þurfa þá að skuldbreytast yfir í íslensk lán) eða óska eftir sértækri skuldaaðlögun. Sértæk úrræði eru háð eigna- og tekjumati.
Lækkun höfuðstóls í allt að 110% veðsetningu af markaðsvirði fasteignar samkvæmt verðmati. Lækkunin miðast við greiðslugetu og eignastöðu. Úrræðið er í boði fyrir lántakendur með hvort sem er erlend eða íslensk fasteignalán. Erlendum lánum þarf að breyta í íslensk lán til að af lækkun höfuðstóls getur orðið. Í boði eru verðtryggðir vextir 5,25% eða óverðtryggðir vextir sem miðast við vexti á millibankamarkaði (REIBOR) + 1,50%. Ef greiðslugeta lántaka dugar ekki til að standa undir láni með 110% veðhlutfall, stendur til boða sértæk skuldaaðlögun fjármálafyrirtækja (sjá hér fyrir neðan), þar sem veðhlutfall getur farið niður í allt að 80% af markaðsvirði fasteignar.
Sértæk skuldaaðlögun fyrir einstaklinga
Sértæk skuldaaðlögun er ætluð einstaklingum og felur í sér samning milli kröfuhafa og lántaka um leið til að laga skulda- og eignastöðu lántakans að greiðslugetu hans. Lántakinn greiðir af skuldum sínum eins og greiðslugeta hans leyfir á samningstímanum en kröfuhafar geta fallist á eftirgjöf krafna, hlutfallslega lækkun þeirra eða gjaldfrest á þeim kröfum sem eru umfram greiðslugetu (sjá einnig svar við spurningunni: Hvaða skilyrði þarf að uppfylla til að skuldaaðlögun komi til greina?). Gert er ráð fyrir sölu eigna umfram það sem nauðsynlegt er til venjulegs heimilishalds en miðað við að í lok skuldaaðlögunartímabilsins haldi lántakinn hóflegu íbúðarhúsnæði og einum bíl með viðráðanlegri greiðslubyrði. Ef lántaki stendur ekki við greiðslur í samræmi við gerðan samning um skuldaaðlögun geta kröfuhafar ákveðið að skuldaaðlögun falli niður.
Einstaklingur sem leitar eftir skuldaaðlögun skal snúa sér beint til aðalviðskiptabanka síns (banka eða sparisjóðs) sem leiðir skuldaaðlögunarferlið og telst því umsjónaraðili. Með aðalviðskiptabanka er átt við þann banka eða sparisjóð þar sem viðkomandi er með launareikning sinn.
Athugið að öll þjónusta vegna lána SPRON er hjá Arion banka
Viðskiptavinir sem vilja nýta sér ofangreind úrræði geta leitað til þjónustufulltrúa í næsta útibúi Arion banka um liðsinni.